أكيد قريت عن اعتصام يوم 8 يوليو في التحرير , أكيد غ في بالك مليون سؤال وتعليق:
مين الناس دي ؟ بلطجية ولا إيه ؟
كفاية بقى زهقنا
خربتوا البلد
اهدوا شوية
الخ ....
احب أقولك إيه هي مطالب 8 يوليو
1-حد ادنى للأجور 1200 جنيه ، وحد اقصى للأجور ، مع مراقبة الاسعار حتى تتوافق مع محدودى الدخل
ده كان مطالب أساسي من مطالب الثورة ومتحققش.. ممكن يكون مش فارق معاكي بنسبة كبيرة لأن دخل عيلتك الشهري فوق ال1200 وبالتالي هو مطلب لا يمسك
بس لمعلوماتك "حكومة الثورة " حددت الحد الادنى بـ700 ورجعت قللته تاني ل 694
يعني تخيل إنه أسرة كاملة مطلوب منها إنها تعيش وتاكل وتشرب وتسكن وتلبس وتعلم بعيالها بمبلغ اقل من المبلغ امي إنت بتخدو عشان تقضي الويك اند في الساحل
حوالي نص الشعب المصري تحت خط الفقر يعني ده مطلب نص الشعب المصري ومفيش حاجة بتقول استنوا أو اهدوا لأن معانا إنه واحد بيشتغل في مؤسسة وبيقبض نص مليون جنيه وفيه موظف في نفس المؤسسة بيقبض 400 جنيه يبقى فيه فلوس في البلد ويبقى حق الناس دي تعيش
وفي الاخر نغلط العامل الغلبان اللي بيعتصم عشان بيطالب بـابسط حقوقه وهي لقمة العيش ده لاننا مش حاسين معانته وقاعدين في برج عاجي اسمه عجلة التنمية .. رغم إنه لو حصل خرااب للإقتصاد العامل ده أول واحد هينضر مش إنت
اتخلى عن طبقيتك وفكَّر في غيرك مش معنا إن المطلب ده لا يمسك ولا يؤثر فيك يبقى ده مبرر لنقدك للمطالبين بيه
2-المحاكمات العلنية والسريعة لمبارك واولاده ووزراءه وحاشيته الفاسدة ، وكل من افسدوا علينا الحياة السياسية
مطلب مش محتاج إني أبرره.. المماطلة واضحة ومفيش حد يقول ده خط سير القضاء أو الموضوع هيخد وقته لأن 5 شهور هو وقت أطول من اللازم ودي ثورة مش قضية خلع ... مبارك والحاشية افسدوا وسرقوا وقتلوا وعذبوا والذي منه واعتقد إنه الاعلام الاصبح حاليا "اعلام جرايد صفراء" بقى الهدف الاوحد منه هو كشف فضائح مبارك والشلة اقرأ كام فضيحة واعرف هم عمله إيه في حق بلدك واعرف إنه التباطؤ تواطؤ
3-تكريم الشهداء وتعويض اهالى الشهداء ، وسرعة محاكمة قتلة الشهداء
حق الشهيد بالنسبالك إيه ؟
أكيد مش إنه صوره تطلع في أغاني الثورة أو تتنشر في مقالة أو إنه يتعمله صفحة على فيس بوك
حق الشهيد هو القصااص القصااص
وده متمش
فيه شرطي واحد من اللي قتله الشهداء اتحكم عليه ؟
فيه قناص واحد اللي قتله الناس اتمسك ؟
وفوق ده كله كمان اطل علينا وزير الداخلية بطلعته الفوق البهية واقر مايلي : من مات أما أقسام الشرطة فـهو بلطجي وليس شهيد .. العيسوي نصب نفسه ربنا هيحدد مين شهيد ومين لأ ومين يستحق صكوك الشهادة
وده اللي حصل .. اللي حصل إنه تم اختزال الشهداء في الطبقة المتوسطة بس .. تم اختزال الالف في صورة 100 أو 150 شهيد بس بيطلعوا بصورهم في وسائل الإعلام ... في الوقت نفسه نسينا أو تعمدنا ان ننسى شهداء المناطق الشعبية
ووصل بينا الإستبداد والفاشية إننا اتهمناهم بالبلطجة هم واهاليهم
وصل الجرأة إننا أما اخو واحد شهيد اتمسك وهيتحاكم عسكريا قلنا أحسن عشان شكله مش ولابد !
معرفناش نحاكم ولا واحد من اللي قتله الشهداء ولسة بنحدد على مزجنا مين شهيد ومين بلطجي
حق الشهيدوالمصاب أختزل من قبل المجلس العسكري في صورة تعويض يترملهم كل أول شهر كأنها حسنا أو منحة أو تفضل .. كأننا عملنا اللي علينا وزيادة باننا بنرملهم عضمة
وفوق ده كله , استخدمه أسوأ الاسلحة وهو الدين وبيلعبوا على الفقراء من اهالي الشهداء بمشروعية قبول الدية مقابل التنازل عن البلاغات ...
بيشتروا احلامهم واحلام ولادهم الشهداء بـ 100,000
4-تكريم المصابين ، وعلاجهم على نفقة الدولة ، وتعويضهم.
تخيل معايا إنه لسة في موجود مصابين مش لاقيين حق العلاج ولا بيخدوا تعويضات ويوم مابيخدوا بنحسسهم إننا بنشحتهم في الوقت نفسه اللي مبارك بيتعالج بفلوس ضرايبنا في شرم الشيخ في مستشفى 5 نجوم وليه طاقم الماني
أما من فقد عنيه وقت الثورة فـمع كل يوم بيفوت عليه بيموت الامل إنه يشوف تاني لأن حتى معوش اللي يكمل إنه يتعالج بـ"طاقم مصري "
5-حرمان أعضاء الحزب الوطني السابق من حق الممارسة السياسية لمدة 5 سنوات على الأقل و تفعيل قانون الغد
احنا منعرفش إلى مشاهير هذا الحزب , منعرفش مين كان في القرى والنجوع والاماكن المهمشة واللي ورد يستغل الفقر والقبلية والذي منه عشان ينجح في الانتخابات اللي جاية ولازم تحت في دماغك إنه الانتخابات اللي جاية هتحط برلمان هيكتب الدستور
6-الافراج الفورى و التام عن كل المعتقلين السياسيين واصحاب الرأي من يوم 25 يناير وما قبلها الى يومنا هذا .
7- الوقف الفوري للمحاكمات العسكرية للمدنيين ، واعادة محاكمة من تم محاكمتهم عسكريا من المدنيين امام محاكم مدنية .
تخيل معايا إنه من ساعات الثورة وأكتر من 9,000 واحد اتحاكم عسكريا !وهو انجاز محصلش في عهد مبارك
ولو إنت متعرفش يعني إيه محاكمة عسكريا رجاء استخدم جوجل :
عارف كام شاب ضاع مستقبله ظلم بسبب المحكمة العسكرية ؟
عرف يعني إيه إنك تتعرض على النيابة من غير محامي ؟
عارف يعني إيه إنك تتسجن من غير حق طعن ولا استئناف؟
عرف يعني إيه كل ده يحصل بعد الثورة ؟ يعني احنا بنرجع ل ورا مش بنطلع ل قدام
8-التطهير الشامل لكل مؤسسات الدولة و يشمل كل من :
تطهير جهاز الشرطة من كل القيادات السابقة فى عهد حبيب العدلى ، و حل جهاز الامن الوطنى ( امن الدولة سابقا)
علاقتك إيه بالداخلية أو الشرطة عموما ؟ دخلت قسم كام مرة ؟ الغالبية العظمى من الناس علاقتها مع الأقسام تتلخص في البطاقة, الرخصة , الباسبور وفي حالة لو اتعرضت ل سرقة أو مخالفة أو حادثة
نقول تاني برده , الغالبية العظمى مننا مسنودة يا قريبك لوا يا صاحب باباك عقيد .. الخ
يعني بتخش القسم بيضرب تعظيم سلام وتشرب الشاي وتطلع من القسم باشا وترجع تقول بيشتموا في الشرطة ليه ؟ بيقولوا عليهم بلطجية ليه ؟ حرام عليكم ادلهم فرصة
ارجوك عزيزي القارئ , ارجع ل أي مجلس حقوقي زي مركز القاهرة لحقوق الإنسان , مركز النديم , مركز هشام مبارك أو الشبكة العربية لحقوق الإنسان وأسأل عن مايلي "
قسم الاربعين
قسم سيدي جابر
قسم المنشية
قسم السيد عيشة
قسم عابدين
قسم الازبكية
دولة بعض وليس الكل .. لاحظ بقى كمية الإنتهاكات اللي بتم ضد الناس قبل مايتم إدانتهم أصلا .. كمية البلاغات الملفقة كمية الاتهامات الباطلة والذي منه
كل ده لانهم مش مسنودين ..
نفس الاقسام ارجعلها واضف عليها الوادي الجديد بعد الثورة بس استثني منهم قسم الاربعين لانه مبقاش ليه وجود بعد الثورة
وشوف كام الإنتهاكات
قبل متعمل تعليق واحد على النوت لازم تعمل ده واتحداك اتحدااك لو الطلبـده ميجيش على هواك
تطهير القضاء المصرى ، والنيابات العامة ، واقالة النائب العام الحالى
كفانا تقديس بقى القضاء المصري قضاء فاسد من ساسه لراسه ودي حقيقة لازم نعترف بيها
الخمستشرات, التأجيلات, والبراءات والكفالات انواع من الفساد والمماطلة ومفيش جدية في الحكام
نفس الموضوع يسري على النائب العام .. التباطؤ الغير مبرر
احنا في ثورة خلصت افتراضيا في 18 يوم .. يعني عنصر السرعة والجدية مطلوب
مفيش شفافية اطلاقا
تطهير الاعلام تطهيرا كاملا و تقديم ضمانات لإستقلاله
الاعلام تحول من اداة في إيد مبارك إلى اداة في إيد المجلس العسكري ... مفيش فرق اعلام موجه ومش مستقل ولا محايد
قال إنت تقدر إنك تعتمد على جورنال رسمي أو قناة رسمية عشان تحصل على معلوماتك؟
مش في اوقات بتبقى فيه تايه مش عرف الصح ولا الغلاة من كتر التشويش الإعلامي ؟
هل تقدر إنك تشوف معارضة حقيقية للمجلس العسكري على قناة رسمية ؟
هل تعلم إنه كل القنوات والجرائد اللي بيسموها "حكومية " المفروض يبقى اسمها "شعبية " لانى مملوكة للشعب ومش للدولة لانى تمول من ضرايب الشعب ؟
من حقك إنه اعلامك يبقى محايد أو منحاز مع الشعب مش العكس !
من حقك إنك أما تفتح قناة المفروض إنها ملكك متلقيش تامر من غمرة ومي كسب هم عينة المحللين السياسيين
حل المجالس المحلية جميعها ، واختيار المحافظين بالإنتخاب على ان يكونوا مدنيين ، وليسوا رجال شرطة او جيش سابقين ضمانا لمدنية الدولة و نظرا لمدنية المنصب
تطهير الجامعات من عمداء ووكلاء أمن الدولة ، و البنوك وباقى مؤسسات الدولة جميعا و على رأسها الحكومة من كل الفاسدين وخاصة من ينتمون الى الحزب الوطني المنحل الفاسد و أعضاء لجنة السياسات
9-الإفصاح عن خطط مدعومة بجداول زمنية للقضاء على البطالة ومشكلة إسكان الشباب و أننا على يقين العلم بأن هذا المطلب يحتاج المزيد من الوقت لتحقيقه و لكن نريد التيقن من وجود الإرادة السياسية لذلك
حكومة الثورة المؤقتة محطتش خطة وحيدة مقبولة تحدد خط السير في مرحلة مابعد الثورة وده مهمتها الرئيسية ... لازم خطة توضح احنا فين والمفروض نعمل إيه وإزاي نعمله بدال من التصريحات الخيبة عن الإستقرار والإنتاج
دي طلبات توفقية عن أسباب النزول
مع الأخذ في الإعتبار إنه اعتصاام مش مليونية ترفيهية غنائية ولا مظاهرات
لاحظ إنه الاحزاب والحركات نفضت اديها وقاالت إنها مش هتعتصم .. يعني هم جين بالمسارح بتعتيهم يغنوا ويمشوا
اللي هيعتصم هو الشعب .. مش الأحزاب ولا مرشحيين الرئاسة
بالتالي هتنقسم الناس إلى 3 اقسام :
قسم نازل يعتصم أو مش هيبعت في الميدان إلى أنه موجود طول النهار هناك
قسم مش هينزل لاسباب عديد لكنه متعاطف
قسم عايش في مرحلة اللا وعي والنكران
القسم الاول عارف هو بيعمل إيه ..
القسم الثاني بقى محتاج إنه ينزل معانا .. لو سبب عدم نزولك هو اهلك ابذل المستحيل عشان تقنعهم وخليهم ينزلوا معاك .. خليهم يقروا النوت ولو إنت عايز تأكيدات ل أي كلام في النوت أنا عندي مصدرها
لو فيه اسباب صحية أو غيرأوه تمنعك ناضل من البيت
أيوه من البيت : تابع الاخبار أول بـأول وانقلها .. اتاكد من صحتها الاول عشان متبقاش بتنشر اشاعات
تابع احتياجات المستشفى الميداني أول بـأول ولو تقدر تساعد ساعد
اتكلم مع ناس عندها قابلية للنزول وخليها تنزل
بما أنه الإعلام مشوش خليك إنت الإعلام الشعبي أو ال
citizen journalism
يعني إنت حلقة الوصل بين الميدان والناس اللي مش موجودة فيه
أما القسم الثالث فـممكن إنه يلتزم الصمت تماما لأن آخر حاجة الناس محتاجها إنها تفقد الثقة بنفسها
امبرح أنا كنت في مسيرة توعية في مدينة نصر بنوزع منشورات ليوم الجمعة رد الفعل كان ايجابي جدا لدرجة إنه سواق ميكروباص قال لوحده مننا أنتم ليه سبته الميدان ارجعوا تاني
عار على الطبقة المتوسطة إنها تعيش في برجها العاجي ده ...
افتكروا شعار " عيش حرية عادلة اجتماعية "
وإن كنت مش بتعاني من مشاكل بخصوص العيش و العدالة الإجتماعية يبقى ناضل عشان الحرية أو أسكت وعيش تحت حكم العسكر
