تشرب آخر بق من فنجان القهوة الصباحي ومعاها اخر نفس لسجارة .. تطفي السجارة وكأنك بتدفن نفسك وتفتح الجورنال. الجورنال الورقي فقد قيمته في عصور ما بعد الحداثه بس القراءة من الورق لا تفقد قيمتها أبدًا .
الفطار مش مهم , المهم هو الموسيقى اللي بتملا سكون البيت
تفاصيل صغيره في كل حاجة في اليوم .. الشاور الصباحي مختلف النهارده .. المايه بارده جدا بس إنت عايش في حالة وجدانية مختلفة لدرجة إنك فقدت إحساسك بدرجة الحرارة زي مافقدت إحساسك بالقهوة والسجارة والجورنال الصبح .. زي مانسيت نوع الموسيقى اللي كانت مالية سكون البيت .
التفاصيل موجودة في عقارب الساعة اللي مش عايزة تمشي أو تتحرك وكأن عقارب الساعة اتحالفت كلها عشان تسقطك في فخ النسيان أو بتحاول .
الجو بارد جدا .. شيء مش مهم لكائن شتوي زيك .. نفسك تمطر؟ مين مش بيحب المطره؟ بس مش هتمطر.... الشمس ظاهره على استحياء من ورا السحاب وكأنها بتحاول تقول أنا حقيقة وانا واقع وانا شيء موجود حتى لو مش ظاهر .
الوقت بيمر ببطء والموسيقى اللي مالية البيت كانت لفيروز .. صداع غريب وشعور عميق بالرغبة في الحزن بس النهاردة مفيش وقت لكل ده .
و يهل علينا ديسمبر من تاني متوج بخمس سنين من ذكريات ممكن العقل ينسي التفاصيل بس القلب لأ .. ذكريات محملة بسعادة لدرجه وجع القلب ... ويفضل ديسمبر هو الشهر المفضل .
No comments:
Post a Comment